Борел: Се надевам дека лидерите на земјите од ЕУ ќе го потврдат кандидатскиот статус на БиХ

Високиот претставник на Европската унија за надворешна политика, Жозеп Борел ќе присуствува на денешниот самит на Европскиот совет на кој ќе се расправа за доделување кандидатски статус на Босна и Херцеговина.

По тој повод, пред средбата, Борел зборуваше за состојбите во Западен Балкан и се осврна на доделувањето кандидатски статус на БиХ.

„Навистина се надевам дека на денешната средба лидерите ќе се договорат за доделување кандидатски статус на Босна и Херцеговина. Силно ја поддржувам таа одлука. Тоа би бил многу важен чекор за земјата, на нејзиниот пат кон исполнување на реформите, но и важен чекор за целиот регион“, рече Борел.

Шефот на европската дипломатија се осврна и на ситуацијата во Косово.

„Ќе ги информирам лидерите за ситуацијата во Косово и за разговорите со Белград и Приштина и ќе повикам на мир и дијалог. Тоа е единствениот начин за европската перспектива на Косово и Србија. Важно е да се отстранат барикадите и да се посветиме на дијалогот“, порача Борел.