Боки 13: Рускоска не доаѓа на судењата, барам изземање

Бојан Јовановски кој е обвинет во случајот Меѓународен сојуз бара смена на обвинителката Вилма Рускоска.

На денешното судење рече однесувањето на обвинителката е тенденциозно, непрофесионално и понижувачко бидејќи повеќе не се појавувала на судењето, а често се менувале и обвинителите кои ги праќала како нејзина замена.

-Го молам државниот јавен обвинител Љубомир Јовески да одреди кој е застапник на ова обвинение кое според мене опстојува на стаклени нозе и без докази. Рускоска мислеше дека е доволно да го поднесе обвинението, а потоа да ги праќа своите заменици кои не се упатени во предметот, покажуваат непознавање на материјата, па сметам дека Јовески треба да ја изземе Рускоска и да назначи нов обвинител за да знаеме кој го застапува овој предмет, рече во судницата Бојан Јовановски.

Денешното судење продолжи со изведување материјални докази од направените финансиски истраги.

Освен Јовановски, во случајот со невладината Меѓународен сојуз им се суди и на неговиот татко, Фросина Ременски, Јасна Ерцеговиќ и Христина Блажевска.

Обвинети се за измами на двајца бизнисмени, кои според обвинението биле оштетени за еден и пол милиони евра.

Зоран Јаневски