Бесими: Отплатата на долгот ќе се врши од домашни и надворешни извори

Проектираниот дефицит и отплатата на долгот во износ од 52,1 милијарди денари по основ на доспеани обврски, од кои половина е еврообврзницата од 2016 година, ќе се врши од домашни и надворешни извори.

Буџетскиот дефицит е околу 700 милиони евра од кои 250 милиони се за справување со последиците од енергетската криза кои зависно од потребите ќе се користат за поддршка на стопанството и граѓаните, 220 милиони се за отплата на камати и 250 милиони за изградба на Коридорот 8.

– Годинава, имаме три големи ставки. Ако не ги гледаме нив, трошиме помалку отколку што собираме од даноци. За плаќањето на камати за претходни долгови немаме избор и мораме да ги исплатиме,  енергетската криза не е нешто што можеме ние да го контроилираме и за тоа мораме да одвоиме средства, а капиталната стратешка инвестиција на Коридорот 8 значи раст за нашата држава, подвлече Бесими на прес-конференцијата во Владата на која го презентираше Предлог-буџетот.

Посочи дека 110 милиони евра од Меѓународниот монетарен фонд треба да влезат во трезорот на Народната банка, а до мај следната година уште 170 милиони евра. Се очекуваат и 80-те милиони евра грант од Европската комисија, а во преговори сме и со Светската банка за добивање на средства преку развојна програма, но за ова бројката сеуште не е дефинирана.