Бабовски: Континуирано се проверува дали субвенциите стигаат до вистинските земјоделци

Сите мерки за исплата на субвенциите ќе се спроведуваат во време кога им се најпотребни за земјоделците. Следна фаза на исплата се мерките за растително, градинарско и овоштарско производство, а континуирано се прават проверки за средствата од субвенциите да стигнат до вистинските земјоделци, порача денеска директорот на Агенцијата за финансиска поддршка во земјоделството и руралниот развој (АФПЗРР) Николче Бабовски.

Тој посочи дека преку контролниот механизам се заштедуваат по два милиона евра годишно. Контролите и евентуалното санкционирање се вршат пред исплатата на мерката, а апликантите имаат законска обврска во рок од седум дена да ја известат АФПЗРР за било која промена на пријавените капацитети. Во ИПАРД програмата, пак, има контрола пред потпишувањето на договорот, контрола при текот на инвестицијата и пред исплата и контрола во наредните пет години дали добиените средства и набавената опрема се користи соодветно на тоа за што е кофинансирана.

-Кај диретните плаќања по закон треба да се спроведува контрола на примерок од пет отсто, во Европа тоа се прави кај 5,5 отсто од пристигнатите барања, а АФПЗРР токму за  да обезбеди наменско искористување, годишно врши контроли на 7,5 отсто од бројот на апликации. Контролата е зголемена со цел средствата да стигнат кај вистинските земјоделци, рече Бабовски во одговор на прашање на денешната прес-конференција во Платежната агенција.

Законот, појасни, дозоволува можност за санкционирање на сите кои имаат остапки од дозволените 20, односно 30 отсто од пријавените и декларираните капацитети во зависност дали се работи за сточарско или растително производство.

-Сите кои ги надминуваат овие законски дозволени разлики во зависност од големината на разликата влегуваат во едногодишна или повеќегодишни санкции. Преку спроведувањето на одредбата Агенцијата за овие две години заштеди годишно по два милиона евра во Беџетот, рече Бабовски и додаде дека тие пари повторно се враќаа во Буџетот и повторно се наменети за другите мерки во секторот земјоделство.

-Анализите покажуваат дека нашите земјоделци се свесни и не влегуваат во ваков ризик, а најголемиот дел од злоупотребите се случуваа заради недоволна информираност и едукација, а некогаш и недоволна помош при пополнувањето на апликациите. За другиот дел каде се најдени намерни злоупотреби санкциите се ригорозни, односно актуелната и наредните три години не добиваат субвенции. Тоа се средства што многу значат за земјоделците, потенцира Бабовски.

Предочи дека резултатите од субвенционирањето не се гледаат веднаш и посочи дека субвенциите се даваат со цел да се развие земјоделството, да се зголеми и да се модернизира домашното производство за да се намали разликата меѓу увозот и извозот на земјоделските производи и преработувачката индустрија во земјава.

Од годинава субвенциите не можат да надминат 180 милиони денари или 300.000 евра за најголемите корисници кои во минатото земаа милионски суми.