Автобус во движење изгоре на автопат кај Солун

Градски автобус целосно изгоре рано утринава во солунското предградие Синдос, откако во него избувнал силен пожар додека сообраќал на својата редовна линија. Како што пренесува грчкиот весник „Катимерини“, инцидентот се случил на автопатот Патра–Атина–Солун–Евзони.

Во моментот кога се појавил пламенот, во возилото имало тројца патници и возачот. За среќа, сите четворица успеале навреме да го напуштат автобусот пред огнот целосно да го проголта. Иако противпожарната служба веднаш интервенирала, возилото е целосно уништено.

Грчките власти веќе спроведуваат истрага за да се утврдат причините за самозапалувањето на автобусот, кое предизвика краток застој во сообраќајот на овој дел од автопатот.