Австрискиот селектор Фода: Не знам дали Арнаутовиќ е спремен за 90 минути

Селекторот на австриската фудбалска репрезентација, Франко Фода на прес конференцијата во пресрет на дуелот со Македонија кој што се игра денес со почеток во 18 часот на националната арена во Букурешт, соопшти дека не знае дали Марко Арнаутовиќ ќе стартува против Македонија, но посочи дека искусниот напаѓач може да започне на клупата во Букурешт.

 

„На крајот на краиштата, морам да донесам одлука дали Марко е подготвен 90 минути или не“, рече Германецот вчера на неговата последна прес-конференција.

 

Арнаутовиќ се врати на тимскиот тренинг пред само една недела, откако пред еден месец се здоби со повреда на бутниот мускул. На последниот подготвителен меч на Австрија со репрезентацијата на Словачка тој одигра само 30 минути.

 

Арнаутовиќ во петокот потенцираше дека е подготвен да биде стартер. Сепак, таму може да се претпочита голгетерот на Штутгарт, Саша Калајџиќ.

 

„Морам да донесам одлука дали тоа ни одговара од самиот почеток - или дали тој ќе влезе да му даде на поттик на тимот“, рече Фода за ситуацијата со Арнаутовиќ.