Асфалтирање на улиците во штипското село Долани

Општина Штип од денеска започна со активности за асфалтирање на улици во село Долани вклучително и пристапот до селото. На отпочнување на градежните работи присуствуваше и градоначалникот на Штип, Илчо Захариев, кој истакна дека во ова село ќе се асфалтираат улици во должина од еден километар.

- Повеќе од пет децении жителите на село Долани има потреба од асфалтирање на улиците. Инвестицијата е во вредност од шест милиони денари, кои се обезбедени преку Агенција за финансиска поддршка на руралниот развој и Владата. Ќе го направиме патот од црквата Свети Илија се до долниот дел на селото, каде што води кон излезот за регионалниот пат. Ова е еден од трите проекти низ селата кои се превдидени за реализација до крајот на годината. Наша цел е да обезбедиме услови за враќање на луѓето бидејќи овде има многу квалитетно земјоделско земјиште, рече Захариев.

Тој најави дека до крајот на годината ќе се направат и улиците во село Врсаково, потоа во Суво Грло, вклучувајќи изградба на  мост на Лакавичка Река, а исто така ќе се доизгради и  преостанатиот дел од околу еден километар до селов Пухче, каде годинава беа асфалтирани  околу 3,5 километри од овој пат.