Асад им понуди амнестија нa бунтовниците кои ќе се предадат доброволно

Сирискиот претседател Башар Асад денеска потпиша указ со кој се предвидува амнестирање на сите бунтовници кои во следните три месеца ќе им се предадат на властите и ќе го положат оружјето.

Оние кои ќе ги ослободат заробениците нема да бидат казнети, доколку се предадат во рок од еден месец, се наведува во указот.

Како што јавија сириските државни медиуми, амнестијата се однесува само за граѓани на Сирија.

Оваа понуда следи откако рускиот министер за одбрана Сергеј Шојгу објави дека Русија и Сирија денеска ќе започнат „голема хуманитарна операција“ во Алепо, со цел да им се помогне на граѓаните кои „станале заложници на терористите“.

Шојгу истакна дека руската и сириската војска ќе направат три коридори за цивилите за да го напуштат градот, а четвртиот коридор ќе биде отворен за екстремистите кои сакаат да го положат оружјето.