Аргентина ја напушта контролата врз валутата откако обезбеди нов кредит од ММФ

Аргентинската ултралиберална влада вчера објави значајно ублажување на строгите ограничувања за валутата, откако беше одобрен новиот заем од 20 милијарди американски долари од Меѓународниот монетарен фонд (ММФ), пренесе ДПА.

Министерот за економија, Луис Капуто, објави дека на граѓаните на Аргентина ќе им биде дозволено да купуваат неограничени количини на американски долари, со што се укинува претходното ограничување од 200 долари месечно. Капуто изјави: “На поединците во Аргентина ќе им биде дозволено да купуваат неограничени количества американски долари.”

Официјалниот девизен курс ќе се префрли од фиксен систем на варијабилен, овозможувајќи му на пезосот да осцилира во рамки на одреден опсег во зависност од побарувачката на пазарот, информира германската агенција.

Оваа одлука доаѓа по одобрувањето од страна на ММФ на пакетот за финансиска помош во износ од 20 милијарди долари. Аргентина е најголемиот должник на ММФ, со вкупен долг кон Фондот од над 44 милијарди долари. Новите заеми сега треба да се употребат за подмирување на каматите кон ММФ и за зголемување на девизните резерви на централната банка.

Десничарскиот либертаријански претседател Хавиер Милеи, кој ја презеде должноста во декември 2023 година, започна радикални реформи.

Во меѓувреме, илјадници државни службеници беа отпуштени, а социјалните програми беа драстично намалени.

Иако неговите мерки за штедење значително ја намалија инфлацијата, тие исто така ја потиснаа економијата и предизвикаа масовни протести низ целата земја.

Во оваа некогаш просперитетна земја, сега над 50 отсто од населението живее под границата на сиромаштија, пренесува ДПА.