Алкалоид на висински подготовки во Маврово

Освојувачот на Европскиот куп на ЕХФ македонскиот тим Алкалоид ја стартуваше втората фаза од подготовките. Салата во Автокоманда ја замени со Маврово, каде избраниците на Кирил Лазаров ќе се подготвуваат со фокус на физичката подготовка.

Еден од помошниците на Лазаров, Петар Баснарков е задолжен за текот на подготовките барем за овој дел, а тој е задоволен од сработеното досега.

-Играчите посебно тие што се подолго време во екипата ги знаат принципите. Мене ми е ова петта сезона во клубот и сите се запознаени со мојот начин на работа, а и јас сум запознаен со нивните перформанси. Ние во суштина работиме и преку цело лето. Ракометарите добиваат десет дена одмор, а потоа почнуваме со работа во меѓу сезона или т.н. „off season“, што е честа пракса на пример во кошарката. Го работиме тоа така за да дојдеме во ситуација да бидеме 70-80 % подготвени кога ќе стартуваат подготовките. Тоа е битно за да се намали времето потребно за физичка подготвеност, а да се зголеми времето во кое Лазаров ќе може да работи тактика. Ова е особено важно сезонава, затоа што порано почнуваме со натпревари, па така на подготовките играчите буквално од прв ден можат да тренираат со топка, истакна Баснарков.

Марко Митев и Никола Костески кои имаа повреди и го пропуштија крајот од сезоната засега работат одвоено со физиотерапевт, а од следната недела ќе бидат заедно со другиот дел од тимот.

По завршувањето на овој дел Алкалоид ќе замине за Србија и Хрватска, каде ќе одигра и неколку контролни натпревари.

Првиот натпревар во новата сезона за Алкалоид е дуелот со Хановер на 31.август од квалификациите од Лига Европа.

МИА