АЛДЕ го отфрли барањето на Пет ѕвезди за приклучување кон либералите во ЕП

Претседателот на групата на либералите и демократите (АЛДЕ) во Европскиот Параламент Ги Верхофстат ја отфрли вечерва можноста на италијанското Движење Пет ѕвезди да се приклучи кон неговата парламентарна група. 

- Нема доволно гаранции за заеднички дневен ред за реформирањето на Европа, нема доволно заеднички полиња за дејствување по барањето на Пет ѕвезди за приклучувањето кон групата на АЛДЕ, изјави Верхофстат. 

- Постојат основни разлики во клучните европски прашања, додаде тој. 

Претходно, симпатизерите на евроскептичното италијанско Движење Пет ѕвези ја прифатија идејата на неговите европратеници да ја напуштат парламентарната група на евроскептиците во Европскиот Парламент и да се приклучат кон групата на европски либерали. 

Идејата беше иницирана од основачот на движењето Бепе Грило. 

Движењето Пет ѕвезди е во парламентарната група наречена Европа на слободата и директната демократија, а во неа е и Партијата на независноста на Обединетото Кралство на Најџел Фараж.