Активни шест пожари на отворено во државава

Девет пожари на отворен простор се регистрирани денеска до 12 часот на територија на државава. Активни се шест, под контрола е ставен еден пожар, а два се изгаснати, соопштија од Центарот за управување со кризи.

Активен е пожарот во општина Берово, „Дрџински рид“, место викано „Стојковото“ во околината на село Русиново, а опожарени се дабова, букова шума и папрат. Два активни пожари има во општина Липково од кои едниот во регионот на селото Никуштак, каде горат нискостеблеста деградирана шума и дабова шума, а другиот во регионот на село Оризаре, опожарени се мешана шума и ниска вегетација. Активен пожар има и во подрачјето на село Варвара, општина Студеничани, опожарени се мешана шума и ниска вегетација. Во регионот на селата Белица и Ложани, општина Струга исто така има два активни пожари. На двете места гори ниска вегетација.

Под контрола е ставен пожарот во „Вардариште“, општина Гази Баба.

Од изгаснатите, ниска вегетација и ѓубриште гореле во атарот на село Спанчево, општина Чешиново-Облешево, а ниска вегетација била опожарена и во општина Тетово.

МИА