Акција за собирање кабаст отпад во општина Аеродром

Општина Аеродром во соработка со Град Скопје и Јавното претпријатие „Комунална хигиена“ денеска и утре ќе спроведуваат акција за собирање кабаст отпад.

Акцијата денеска ќе се одвива во Ново Лисиче, Реонски центар „Аеродром“, населбата Лисиче и Горно Лисиче. Граѓаните кои имаат кабаст отпад од 7 до 9:30 часот ќе можат да го одложат пред своите куќи или згради. Потребно е да се внимава отпадот да не го попречува движењето на пешаците и возилата и местото да биде пристапно за возилата на ЈП „Комунална хигиена“ за да можат непречено да го соберат отпадот.

В сабота акцијата ќе се одвива во населбите Мичурин, Стар Аеродром, Острово и Јане Сандански.

Под кабаст отпад се подразбира мебел и делови од мебел, бела техника, електрични апарати за домаќинство (шпорети, ладилници, машини за перење алишта и за садови, бојлери и слични предмети), електронски апарати (компјутери, телевизори, музички системи и сл.), но не и градежен шут.