Свет
20. January 2016 - 9:21

АИ: Курдските сили ги уништуваат арапските села во Ирак

Меѓународната невладина организација „Амнести интернешенел“ (АИ) денеска ги обвини курдските сили во Ирак дека намерно ги уништаваат арапските села што се под нивна контрола.

Во извештајот на АИ се наведува дека курдските сили со булдожери срамниле, кренале во воздух или запалиле илјадници куќи во арапските села на подрачјата кои овие сили ги зазеле од Исламска држава, пренесуваат американските медиуми.

Курдските сили, познати и под називот пешмерга, во борбата против џихадистите имаат подршка од САД, која им помага со воздушни напади, со разузнавачки податоци и програми за обука.

АИ наведува дека курдските сили ги уништуваат арапските села во знак на одмазда за тоа што овие арапски заедници, наводно, ја поддржуваат ИД.

Овие арапски села под контрола на курдските сили дојдоа минатата година, кога во офанзива од нив ги потиснаа џихадистите.

Исламска држзава и натаму контролира големи подрачја во Ирак, кои ги освои во летото 2014 година.