„Адвокатот на Васо ќе објави снимка како плаче над мртвото тело, апелирам медиумите да не ја објавуваат“, напиша сестрата на Фросина

Росица Кулакова, сестрата на починатата Фросина, која добила информации дека адвокатот на осомничениот Васил Јованов планира да објави снимка на која се гледа како осомничениот плаче над мртвото тело на Фросина, денеска апелираше до сите медиуми и до пошироката јавност да не го објавуваат видеото, од почит кон починатата и нејзината фамилија.

„Добивме информација по допрен глас дека адвокатот на Васил, Сашо Дукоски на утрешната пресконференција има во план да прикаже видео во кое Васо вришти над мртвото тело на мојата сестра! Познавајќи го неговото минато и адвокатски стил, јасна е целта на Дукоски: да го очовечи убиецот на сестра ми. Да покаже како вришти затоа што му е жал за Фросина, а тој всушност вришти затоа што знае што следи и што го чека него! Вришти затоа што знае што го чека со оглед на неговото криминално минато. Испраќам апел до сите медиуми видеото да не биде објавено, прво од почит кон починатата а потоа и кон семејството како и кон целата јавност што е веќе доволно згрозена од оваа трагедија. Па не ли беше доволно хорор...“, стои во барањето на Росица.