Македонија
2. April 2021 - 10:28

Започна вакцинацијата против Ковид-19 во Крива Паланка

Во одделот за вакцинација во здравствениот дом во Крива Паланка денеска започна процесот на вакцинација на граѓаните против Ковид-19.

Според информациите од директорот на здравствениот дом, Бранко Стаменковски, вакцинација ќе се врши на пријавените граѓани што преку матичните лекари закажале во системот „Мој термин”.

– Од утрово отпочна процесот на вакцинирање на лица над 75 годишна возраст кои имаат термини од системот, закажани согласно координација со матичните лекари. Од Министерството за здравство добиени се во оваа прва фаза 200 вакцини, колкушто и граѓани имаат креирано термини,а процесот на вакцинирање ќе се реализира во четири дена, почнувајќи од денес, со продолжување од понеделник, со имунизација на педесет пациенти дневно, изјави Стаменковски.

Имунизација ќе се врши на жителите на општините Крива Паланка и Ранковце.

-Во нашиот здравствени дом од почетокот на годината се врши и тестирање со брзи тестови на пациентите од двете општини, овој процес исто така се спроведува по извршен преглед од страна на матичните лекари. Само во март извршени биле 461 тестирање на суспектни пациенти од кои позитивни на Ковид-19 биле 193 лица, додаде Стаменковски.