Заев со амбасадори од германското МНР: Поддршка за политиките и евроатлантската интеграција

Премиерот Зоран Заев денеска се сретна со делегација на германското Министерство за надворешни работи, составена од специјалниот претставник за Југоисточна Европа, Турција и ЕФТА-државите, амбасадорот Кристиан Хелбах, амбасадорот Томас Осовски, специјален претставник за ЕУ-политики и германскиот амбасадор во Скопје, Томас Герберих.

– Со Договорот од Преспа покажавме дека преку вистински дијалог е можно решавање на меѓународните проблеми на Балканот. Имплементирањето на Договорот со Република Грција и поддршката која ја добиваме е силна мотивација за остварување на нашата цел, членството во НАТО и започнување на процесот на преговорите со Европската унија, истакна Заев.

Премиерот, изразувајќи благодарност за континуираната германска поддршка за интеграција на Северна Македонија во Европската унија и НАТО, ги истакна добрите билатерални односи меѓу двете земји, со взаемен интерес за унапредување на економската соработка, соопшти владината прес-служба.

На средбата, беше разговарано за придобивките од Преспанскиот договор со Грција и посветеноста на градењето на добри односи со сите соседи и е констатирано дека тоа е силна порака дека регионот на Балканот може да биде носител на мир, безбедност и стабилност.