Свет
9. February 2019 - 18:07

Врескаше од болка, повеќе немаше прсти: Детали од страшните сцени во Париз, фотограф остана без рака на протестите на Жолтите елеци

На саботниот протест на Жолтите елеци пред Народното собрание во Париз на еден демонстрант му е откината десната рака и пожарникарите итно го префрлија во болница.

Евакуиран е со десната подлактица во дебели завои и причината за така тешката повреда засега официјално не е соопштена, но се шпекулира дека граната ГЛИ-Ф4 му ја повредила раката.

Еден од сведоците тврди дека настрадал од граната која полицијата ја користи за сузбивање на нередите и со кои се обидела да го пречи пробивањето на демонстрантите кон Народното собрание.

„Жртвата е фоторепортер и припадник на Жолтите елеци кој ги снимал демонстрантите“, рече Сипријен Ројер.

„Полицијата фрли граната и фотографот ја прекри со раката за да не му експлодира на нога. Го наместивме на страна и повикавме итна помош, не изгледаше добро. Врескаше од болка, повеќе немаше прсти и поголем дел од рачниот зглоб“, додаде тој.

Неколку судири меѓу полицијата, која употреби пендреци и бибер - спреј, и поддржувачите на Жолтите елеци избија на Елисејските полиња. Во еден момент полицајците ги опколија демонстрантите.

Повредениот маж итно е префрлен во болиниа. Гранатата со солзавец ГЛИ-Ф4 содржи експлозивно полнење од 25 грама ТНТ. Француската полиција ја користи од 2011 година.

Денешниот протест набрзо прерасна во судир на полицијата и демонстрантите. Пријавени се повеќе судири на Жолтите елеци и полицијата во кои е користен солзавец, а на социјалните мрежи кружат фотографии од крвавите демонстранти со коментари дека полицијата била исклучително брутална.