Врбица Стефанов седна на клупата на Кожув

Кошаркарскиот клуб Кожув од Гевгелија во новата сезона ќе биде предводен од нов тренер и на оваа позиција е поставен еден од најдобрите македонски кошаркари Врбица Стефанов, кој ќе го замени Марјан Илиевски.

- Почитувани навивачи и љубители на кошарката, ве известуваме дека од денес за тренер на КК Кожув во престојната натпреварувачка сезона е назначен легендата на македонската кошарка Врбица Стефанов. Се надеваме на многу успеси и му посакуваме успешна работа на новиот тренер - објави клубот на својот официјален профил на Фејсбук.

Стефанов е дел од стручниот штаб на македонската кошаркарска репрезентација каде ја има улогата на прв асистент на селекторот Драган Раца. Ова навестува дека Стефанов како тренер на гевгеличани би почнал со работа по 17.септември кога завршуваат квалификациите на Македонија за Европското првенство.   

Во еден кус временски период Врбица Стефанов беше и на тренерската позиција на МЗТ Скопје Аеродром.