Македонија
28. April 2016 - 13:34

Вонредна временска прогноза, големо невреме за празниците

Времето за претстојните празници ќе биде променливо. Утре се очекува повремен слаб дожд, особено претпладне, во сабота сончево со температура до 25 степени, а во недела попладне повторно ќе има врнежи.

Повеќе и поинтензивни врнежи УХМР најавува во понеделник кон вторник, а не е исклучено да има и над 50 литри на метар квадратен воден талог.

Утре ќе биде претежно облачно со слаб до умерен ветер од јужен и југоисточен правец и температура од четири до 18 степени, додека задутре претежно сончево со појава на мала до умерена облачност, но главно стабилно и потопло време со дневни температури од 18 до 25 степени.

Од недела попладне ќе има локална појава на дожд со ретки грмежи кои наместа ќе бидат поројни, особено кон крајот на денот и во вечерните часови.