Во Велес протестен марш на граѓанската иницијатива „За заедничка Македонија“

Граѓанската иницијатива „За заедничка Македонија“ вечерва пред споменикот на Панко Брашнаров во Велес го одржа шестиот протестен марш, кој поддржан од мноштво граѓани продолжи низ главната велешка улица до центарот на градот кај спомениците на Коста Солев Рацин и на Коњаникот посветен на велешките Илинденци.

Учесниците и вечерва, како и изминатите пет дена во голем број мирно и достоинствено ја искажааа својата одлучност да истраат во напорите за зачувување на унитарноста на Република Македонија во одбрана на Уставот, името на државата, грбот и знамето.

Пред споменикот на Коста Солев Рацин во центарот на Велес на присутните им се обрати новинарот Киро Василев. Тој ги повика Македонците заедно да си ја зачуваат државата и да го одбранат Уставот, името на државата, грбот и знамето.