Во штипскиот регион се чистат речните корита

Општина Штип и градежната компанија „Бетон“ - Штип завршуваат со чистењето на речното корито на реката Брегалница.

Раководителот на Одделението за инспекциски надзор во Општина Штип, Тоше Ѓорѓиев на денешната прес-конференција информираше дека над четири километри од коритото на реката Брегалница се исчистени, отстранети се паднати дрвја, а на одредени места извршена е и регулација на реката  согласно планот, но и законската обврска која ја имаат,  со цел да не се поплавуваат населби и земјоделски површини.

-Од речното корито на Брегалница градежните машини се селат на реката Лакавица. Таму ќе бидат исчистени околу 400 метри на преминот меѓу селото Лакавица и селото Пухче, каде што во иднина општината има намера да изгради премин, цеваст пропуст на реката, а преку кој без проблеми ќе се движат жителите на двете села, вели Ѓорѓиев.

Чистењето на речните корита е поддржано од Министерството за локална самоуправа,  кое на општината и доделува нафта за градежните машини кои ги чистат коритата, а оваа година Општина Штип дополнително за оваа акција издвои еден милион денар.

Ѓорѓиев смета дека чистењето на коритата на реките се покажа како успешно, бидејќи  на оние места каде што е исчистено корито нема излевање на реките.