ВМРО-ДПМНЕ: СДСМ да се повлече од Договорот со Бугарија

СДСМ да се повлече од Договорот за добрососедство со Бугарија, побара денеска ВМРО-ДПМНЕ. 

ВМРО-ДПМНЕ смета дека Договорот е штетен и дека не ги почитува интересите на македонскиот народ и на Република Македонија, поради што, нагласува, нема да му даде поддршка. 

- Договор со Бугарија треба да има, но еквивалентен во правата и обврските и во кој ќе се почитуваат националните и државни интереси на Република Македонија, подвлекува партијата.

Квалификувајќи ја како антинародна, неспособна и марионетска, ВМРО-ДПМНЕ истакнува дека Владата се уште има шанса да се повлече од Договорот.

- Тоа ќе биде најмал израз на почит кон македонскиот народ. Додека во Бугарија се слави потпишувањето, во Македонија има незадоволство и чувство на пораз, нешто што беше видливо и на прославите на националниот празник Илинден на Мечкин Камен и во Пелинце каде што имаше катастрофална, речиси непостоечка посетеност на народот на овие настани, посочува ВМРО-ДПМНЕ.

Според партијата, СДСМ многу брзо ќе сноси политичка одговорност и уште на локалните избори ќе ја добие пораката на огорченост и незадоволство од народот.

- Се залагаме за пријателски и добрососедски односи со Бугарија и за пријателство меѓу македонскиот и бугарскиот народ, но овој Договор кој Заев го потпиша не ги почитува интересите на македонскиот народ и на Република Македонија и тоа е видливо и јасно, народот не го поддржува овој Договор, а стручната јавност има сериозни забелешки за неговиот текст. СДС доколку се потрудеше и доколку имаше капацитет, желба и волја за работа, можеше да постигне подобар договор, кој ќе беше вистински израз на пријателство и соработка и со кој немаше да има чувство на победник и поразен, стои во соопштението од ВМРО-ДПМНЕ.