Македонија
10. April 2018 - 9:56

ВМРО-ДПМНЕ: Македонија е заробена држава

Република Македонија е заробена држава. Институциите не се во служба на граѓаните, туку на владејачката структура. Демократијата е суспендирана, а правото девалвирано.

Државата тоне на индексот на корупција на Транспаренси. Правосудството се претвори во испостава на СДСМ. Одлуките не се носат по закон, туку по партиски диктат.

Правната несигурност и корупцијата донесоа економска стагнација. Република Македонија стагнира во услови кога земјите од регионот и Европа имаат раст. Економијата минатата година остана забетонирана на нула. Нема раст, нема подобар живот. Секој  ден со СДСМ на власт е се полош и полош.

СДСМ ги задолжи државата и граѓаните за 1.6 милијарди евра за 10 месеци. Нула инвестиции. Покачување на давачките. Ова ја зголеми несигурноста кај граѓаните. Општеството е во апатија. Граѓаните не се чувствуваат сигурно.

СДСМ катастрофално ја води државата. Свесни за бездната кон која ја туркаат Република Македонија, а слепо водени од желбата за власт се злоупотребуваат институциите, законите се само мртво слово на хартија, а судството нем извршител на наредбите од партиската врхушка.

Десетици лекари, полицајци, уметници и истакнати граѓани со месеци неосновано се малтретираат низ затвори и судови само затоа што не постапувале согласно антидржавните политики на Заев.

Десетиците политички жртви се средство за дефокус на власта од катастрофално лошите политики. Економската стагнација и општествената апатија.

Правосудните органи паднаа на тестот за независност. Цела Европа и целиот демократски свет видоа дека во Република Македонија нема независно и непристрасно судство, туку судство под контрола на власта.

Дејствијата  на правосудните органи во врска со настаните од 27-ми април се темна страница на македонското правосудство. Овие дејствија ќе бидат проучувани низ светот како начин на политичка конструкција на судски процес и ќе бидат срам за цела една генерација Македонци.

Овој терор мора да запре. Државата мора да стави крај на незаконието. СДСМ не може да обезбеди праведност. СДСМ е креатор на неправедноста. Граѓаните заслужуваат правна држава, со цврсти принципи. Граѓаните заслужуваат подобро.