Македонија
19. July 2019 - 13:00

ВМРО-ДПМНЕ: Катица Јанева да даде одговори за сомнежите кои се врзуваат за неа

 

Скандалот со рекетарско – политичко – судско – медиумскиот октопод секој ден добива нови и нови димензии. Затоа влегуваат од лага во лага и со тоа уште повеќе се заплеткуваат.

Прво, како е возможно специјалната обвинителка Катица Јанева да се разболи во истиот ден кога излезе овој скандал па со два дена задоцнување да разбереме дека отворила боледување?

Која здравствена установа и го издала ова боледување и дали Комисија од Фондот за здравство ја проверила веродостојноста на боледувањето.

Со оглед на тоа што Катица Јанева четири дена бега од соочување со јавноста да даде одговори за сомнежите кои се врзуваат за неа, објективно е да се сомнева дека таа веќе ја напуштила државата злоупотребувајќи го оправдувањето со боледување.

Тоа само потврдува како површно и тенденциозно се води постапката и истрагата за откривање на овој огромен скандал. Целокупната јавност се сомнева дека не е возможно лицата кои се осомничени за овој рекет тоа да го правеле без поддршка на структури на СЈО, па и самата Јанева, а уште помалку без знаење на власта, па и лично од самиот премиер Зоран Заев.

Ако веќе постојат индиции дека Катица Јанева е вмешана во овој криминален октопод кој изнудувал, рекетирал и се заканувал на осомничени во постапка на СЈО, истрагата не смеела да се сведе само на одземање на еден од двата телефони на Јанева. Пазете само еден од двата телефони на Катица Јанева ќе биде предмет на истрагата.

Дополнително ако се знае блискоста на Јанева со осомничениот Боки 13 и фактот што нејзиниот син е вработен во медиумот кој се поврзува со Боки 13, тогаш логично се поставува прашањето дали е викнат на распит Лазар Јанев и дали истото лице е дел од истрагата за рекет?

Јавноста треба да знае дали во текот на истрагата во запленетите компјутери кај осомничените се пронајдени материјали и дали тие материјали се идентични или дел од материјалите кои се во посед на СЈО?

Исто така надлежните треба да одговорат дали во прибавените докази има материјали кои се обезбедени од МВР од лице кое е вработено на висока позиција таму, кое патем е блиско на лицето Фрики од рекетарските приказни кои се вртеа во јавноста во изминатиот период?

И на крајот, дали од истрагата на надлежните се утврдило дали осомничениот Боки 13 контактирал телефонски или остварувал средби со Зоран Заев во Владата во изминатиот период за кој се товари дека вршел изнуда или рекет. Постојат индиции дека лицето Боки 13 добивал насоки кои лица да ги уценува и кои методи да ги користи од високи функционери на власта и СЈО со цел нелегално прибавување на милионски износи.

Ова е премногу сериозен скандал. Ова е октопод во кој приведените се само пипците, а главата се многу помоќни политички и правосудни структури.

Во интерес на правдата неопходна е детална и длабока истрага, а не само декларативна борба со криминалот. Овој случај е вистинската вистина за Македонија, кој јасно ќе ги разобличи причините и последиците на еден процес кој се одвиваше изминатиот период.

На новинарско прашање дали ќе има некои промени за лидерската средба, Благица Ласовска, претседател на Унија на жени на ВМРО-ДПМНЕ одговори:Остануваме на ставот, претседателот Христијан Мицкоски нема да се појави на лидерската средба“.

Таа ги коментираше и вчерашните заклучоци на СДСМ и декларацијата што ја објавија:

- Многу несериозно за политичка партија која што е на власт и која што треба да ја спроведува програмата во која што патем речено вели дека ќе се бори со криминал. Во тек на ваков скандал да донесува декларација. Тие се власт и тие треба да го спроведуваат законот. За нас тоа е премногу несериозно во овој момент да носите декларација кога се соочувате со вакви многу сериозни скандали, изјави Ласовска.