Влијание на преговорите на кризата во Софија и намерата на ВМРО-ДПМНЕ за одложена примена на уставните измени

Ниту нова македонска, ниту нова бугарска влада не може да  ја промени преговарачката рамка со Европската унија за уставните измени да се донесат со одложена примена. Бугарија влегува во нова политичка криза и повторно ќе оди на избори, но експертите од Софија велат дека тоа нема да промени многу во надворешната политика кон Скопје бидејќи очекувањата се повторно да победат политичари со слични ставови како и досегашната влада.

По тврдењата на македонската опозиција дека со добра комуникација и дипломатска офанзива може да се издејствува одложена примена на уставните измени, експертите во Бугарија велат дека такво нешто не е возможно и тоа треба јасно да се каже и во Скопје и во Софија.

Односите Скопје – Софија во последниот период се потполно замрени по бурниот период со Францускиот предлог и почетокот на преговорите на Македонија и ЕУ. Внесувањето на Бугарите во македонскиот Устав е приоритетен услов за продолжување на патот кон Брисел.