Велешките пожарникари со апел да не се палат стрништа и оган на отворено

Територијалната протвпожарна единица од Велес деновиве имаше неколку помали интервенции за гаснење на стрништа и трева. Поради високите температури и опасноста од појава на пожари со големи размери, тие апелираат до земјоделците да не палат стришта, а граѓаните при престој во природа и шума да не фрлаат догорчиња од цигари и не палат оган на отворено.

Љупчо Лепидовски командир на ППЕ Велес во изјавата за МИА, информира дека деновиве имало помали пожари на стрништа и трева кои со нивната брза и навремена интервенција биле спречени пожари од пошироки размери во велешкиот регион.

– Апелираме до земјоделците на совесно однесување и да не се палат стрништата после жетвата, а воедно и до сите граѓани да се воздржат од фрлање догорчиња и палење на оган во природа и посебно во шума, бидејќи може да предизвикаат пожари со несогледливи последици, нагласува Лепидовски.

Посоочува дека и покрај ланското доекипирање со 15 нови пожарникари, сепак ТППЕ Велес со сегашните 29 пожарникари е под потребниот кадровски минимум, кој за велешкиот поширок регион изнесува минимум 43 пожарникари.

ТППЕ Велес секојдневно се соочува и со стари и дотраени возила за гаснење на пожари, а од вкупно шест, моментално две од возилата се неисправни и во функција се само четири застарени противпожарни возила.