Loading Video...
Спорт плус
13. July 2020 - 15:21
Вардарци прашуваат: Каде исчезнаа 1 милион денари од Одбојкарската федерација
Иако во саботата во Штип беше одржано годишното Собранието на Одбојкарската федерација на Македонија, сепак полемиките околу истото продолжуваат и денеска .
Собранието на кое Петар Јовановски доби нов мандат, минало со големи контрадикторности и препукнувања особено, околу финансиското работење на федерацијата.
Финансискиот извештај на ОФМ не доби зелено светло од делегатите, напротив беше вратено на доработка, а дополнително на истиот треба да се направи и ревизија од реномирана ревизорска куќа.
Како што информираат денеска преку соопштение до јавноста од ОК Вардар, причината е разликите во сумите што се наведени во документот на ОФМ (ИЗВЕШТАЈОТ МОЖЕ ДА ГО ВИДИТЕ ОВДЕ), а кои се разликуваат за еден милион денари со оние во завршната сметка поднесена во Централниот Регистар (ИЗВЕШТАЈОТ МОЖЕ ДА ГО ВИДИТЕ ОВДЕ)
Воедно вардарци прашуваат како е можно да се мине на останатите точки кои беа на Собранието, меѓу кои и изборот на претседател, доколку не се добие зелено светло за работата на канцеларијата!?
Во продолжение целосното соопштение на ОК Вардар:
Почитувани,
Би сакале да ја инфоримираме Македонската јавност, а особено Одбојкарските љубители за дел од случувањата на саботното собрание на одбојкарската федерација, посебно за финансискиот извештај кој ни беше доставен неполни 10 часа пред одржување на собранието, со што беа прекршени и одредбите од статутот за свикување на собранието односно прекршен е член 21 согласно кој сите материјали за собранието МОРА да се достават заедно со поканата минимум 8 дена пред одржувањето на собранието, со што се доведува во прашање и легалноста на собранието.
Преку доцна доставениот извештај и ќе можевме да поминеме, доколку беше соодветно изготвен и со точни бројки, но документот од една страна е целосно неточен и со огромен број на грешки. НЕДОЗВОЛИВО за федерација која има буџет од повеќе од 32.000.000 денари.
Кога клубовите ги забележаа недоследностите во финансискиот извештај, едногласно се одлучи истиот да се повлече и да се преработи, а дополнително да се направи и ревизија од реномирана ревизоркса куќа. Причините поради кои не им помина финансискиот извештај на собранието се следни:
1. Финансискиот извештај даден на членовите на собранието во делот на приходи се разликува за безмалку 1 милион денари со извештајот даден при завршна сметка во Централен регистар.
2. Никаде не е наведено по кои основи прима пари федерацијата.
3. Не е наведено дали федерацијата има девизни приливи, а мора да има бидејќи средствата добиени од ЦЕВ се исплаќаат на девизна сметка, како и сите средства од сертификатите за македнските играчи кои играат во страство.
4. Не е наведено на кои правни субјекти се исплаќаат средствата, за кои лица е исплатено плата и кои клубови добиле поддршка?
5. Нема информација кога и кој ги одобрил трошоците на федерацијата и кога е усвоен буџетот.
6. Кој клуб платил котизација и колку се долговите на клубовите?
Да напоменеме дека ОК Вардар беше казнет и суспендиран за натпревари за наводен долг спрема федерацијата и моравме за еден ден да исплатиме 600.000 мкд за да не биде суспендиран од првенството, а на казната немаше право на жалба.
Искрено се надеваме дека сите овие недоречености во извештајот се случајни грешки и дека доцното доставување на извештајот до клубовите е поради немање време да се подготви порано, а дека ревизијата ќе докаже дека се работело согласно закон, но за ова мора да ја известиме јавноста бидејќи преголем е бројот на “случајни грешки” кои се случија на собранието.
Во прилог Ви ги доставувам финансискиот извештај од Одбојкарска федерација и финансискиот извештај од Централен регистар.
Спортски поздрав,
Серафимов Влатко – ОК ВАРДАР Скопје
