Ракомет
3. December 2015 - 12:57

Вардар со многу дилеми околу составот за дуелот со Колдинг

Македонскиот ракометен првак во сабота (5.декември) го игра последниот натпревар оваа година во групата од Лигата на шампионите, а во Скопје ќе допатува данскиот тим Колдинг. Вардарци на гостувањето во Данска го претрпеа првиот пораз оваа сезона во групата откако беа во серија од четири победи. Колдинг славеше со 33:31 на првиот дуел. Сега ситуацијата е поинаква – Вардар е во серија од три порази.
 
На денешната прес конференција тренерот Раул Гонзалес изјави:
- За нас е ова многу важен натпревар. Потребни се два бода за подобар пласман во групата. Колдинг е добар тим, играат добра одбрана и контранапад. Ние имаме потешкотии во составот со повредени играчи и не го знаеме составот со кој ќе настапиме. Карачиќ не тренира 10 дена. Неизвесен е и Македа, Шишкарев е болен, Брумен е истотака неизвесен. Штербик не тренираше и очекувам на денешниот тренинг да видеме со кои сили ќе располагаме.
 
Капитенот Филип Лазаров потенцираше:
- Ќе треба да се победи, особено по трите порази во Лигата на шампионите за да се одржиме во горниот дел од табелата. Колдинг е во форма, одиграа добри натпревари. За нас е важно да победиме и оваа година да ја завршиме со победа во Лигата на шампионите.
Натпреварот Вардар – Колдинг се игра во сабота со почеток во 17:30 часот во СЦ „Јане Сандански“.