Ван Квикенборн: Белгија е влезена во фаза на “наркотероризам“

Во интервју за белгиски медиуми, министерот за правда Винцент Ван Квикенборн, кој е под засилена полициска заштита по заканите за киднапирање, предупредува дека Белгија влегува во фаза на “наркотероризам“, јави дописничката на МИА од Брисел.

Изјавата на првиот човек на белгиската правда доаѓа откако беа разоткриени и елиминирани заканите за киднапирање, најверојатно поврзани со нарко-кругови и шверц на дрога. -Белгија е влезена во нова фаза, фазата на наркотероризмот, изјави Вак Квикенборн за повеќе медиуми. Министерот и неговото семејство се наоѓаат моментално на тајно место или safe house и не е познато до кога ќе мора да остане таму со неговата сопруга и двете деца.

Во меѓувреме уапсени се четири сомнителни лица од Холандија, сите поврзани со шверцот на дрога. Ван Квикенборн рече дека нивната цел била да се дестабилизира општество преку создавање страв во полицијата и судството, затоа што, како што рече, шверцерите се чувствуваат загрозено.