Уште еден инцидент утрово во Турција

Непознат напаѓач отвори оган крај американската амбасада во Турција, јави ТАСС, повикувајќи се на претставник на американскиот Стејт департмент.

Во инцидентот нема повредени. 

Мажот, вооружен со пиштол, бил уапсен од турската полиција, која го истражува случајот. Поради овој инцидент, амбасадата, како и американските конзулати во Адана и Истанбул денеска ќе останат затворени. Интервјуата за издавање на американски визи се преместени за други датуми.

Претходно, турскиот весник „Дејли Сабах" соопшти дека вооружен човек се обидел да навлезе во Американската амбасада во Анкара, но бил уапсен.

Синоќа, во турската престолнина, полицаец го уби рускиот амбасадор Андреј Карлов. Напаѓачот беше ликвидиран.