Фудбал
27. May 2016 - 10:44

У_21: Македонија по позитивен резултат во Киев

Фудбалската репрезентација на Македонија за играчи до 21 година попладнево во Киев ќе одигра натпревар против Украина од групата 3 од квалификациите за Европското првенство 2017 година. Ова за избраниците на селекторот Благоја Милевски е нов предизвик особено што Македонија се наоѓа на третото место на табелата и е со шанси да настапува во баражот.
Нашиот денешен ривал се наоѓа на претпоследното место во групата, а Македонија на првиот дуел на двете селекции постигна победа од 1:0. Атмосферата во таборот на нашата репрезентација е позитивна.
- Треба и на овој натпревар да одиграме максимално како до сега на сите дуели во групата. Да ги извршиме поставените задачи и со самото тоа очекувам позитивен резултат, изјави репрезентативецот Ѓорѓи Зајков.
Натпреварот се игра во Киев, а судија е Рахим Хасанов од Азербејџан. Почетокот на дуелот е во 17 часот.
На чело на табелата во групата 3 е Франција со 14 бодови, Исланд има 12, Македонија е трета со 9, Шкотска 8, Украина 4, а последна е Северна Ирска со 1 бод.