Македонија
13. November 2019 - 8:56

Тркалезна маса „Предизвиците на младите новинари во ера на дезинформации“

Во организација на Младинскиот образовен форум и Радио МОФ денеска ќе се одржи Tркалезна маса на тема „Предизвиците на младите новинари во ера на дезинформации“ во рамки на Деновите на медиумска писменост, кампања организирана од Мрежата за медиумска писменост.

Говорници-воведничари во дискусијата, како што информираат организаторите, ќе бидат: Катарина Синадиновска, еден од основачите и претседател на Советот за етика во медиумите на Македонија, Сунаи Сабриоски, новинар во 24 Вести, Фуркан Салиу, новинар во Клан ТВ и претставник од Здружението на новинари на Македонија.

– Целта на настанот е да се споделат искуства и извлечат препораки и заклучоци, што ќе бидат споделени со образовни институции и новинарски здруженија. Преку дискусијата треба да се понудат и предлози за подигање на новинарските стандарди кај младите новинари и подобрување на медиумската состојба во земјата, се наведува во соопштението на организаторите.

Настанот е поддржан од National Endowment For Democracy (NED) и има за цел да поттикне активизам и социјална инклузија, истовремено нудејќи веродостојни информации и борејќи се против ширењето на дезинформации кај младите преку мултимедијалната платформа Радио МОФ (www.radiomof.mk).