Трамп го повика Путин да запре со „бесмислената војна“ во Украина

Претседателот на САД, Доналд Трамп, изјави дека Русија ќе се соочи со „високи даноци, тарифи и санкции“ доколку претседателот Владимир Путин не ја оконча војната во Украина.

На својата социјална мрежа „Трут соушал“ (Truth Social) Трамп денеска објави пост со изрази на „љубов“ кон рускиот народ и спомена дека секогаш имал „добри односи“ со Путин, по што упати директно предупредување да се „прекине оваа бесмислена војна!“

Тој напиша: „само ќе биде полошо. Доколку не постигнеме ’договор‘, и тоа што поскоро, нема да друг избор освен да воведам високи даноци, тарифи и санкции на сè што Русија продава на Соединетите Американски Држави и на други вклучени земји.“

-Време е да се ’постигне договор. Не треба луѓето повеќе да гинат, напиша Трамп и додаде дека со ова прави услуга на Русија, и на претседателот Путин, „чија економија пропаѓа. Постигнете договор и запрете ја оваа бесмислена војна“.

Русија моментално е најсанкционираната земја во светот, и само мал број на клучни ентитети или сектори сè уште не се предмет на американски и европски ограничувања.

Руските банки и воено-индустриските претпријатија се адаптираа и развија начини да ги заобиколат постојните санкции.