Македонија
11. December 2018 - 8:56

Трајко Вељаноски ќе сведочи за „27 април“

Со сослушување на четворица сведоци, меѓу кои и поранешниот претседател на Собранието Трајко Вељаноски, денеска во Кривичниот суд во Скопје ќе продолжи судењето за настаните од 27 април минатата година во законодавниот дом.

Судијката Добрила Кацарска најави дека и на рочиштето закажано за четврток ќе бидат сослушувани сведоци, а во петок обвинителството треба да приложи дополнителни докази.

Наведе дека веќе следната недела се планира обвинетите и нивните бранители да почнат со изнесување на завршните зборови.

За случувањата во Собранието на 27 април 2017 година обвинети се вкупно 33 лица, од кои 31 лице за терористичко загрозување на уставниот поредок на државата и двајца за поттикнување. Претходно поради влошена здравствена состојба на обвинетиот Сашко Марковски постапката за него беше одвоена и треба да продолжи по еден месец.

Меѓу обвинетите се повеќе пратеници, вработени во МВР и собраниското обезбедување, уметници. Тие пред Судот кажаа дека го разбираат обвинението, но не се чувствуваат за виновни.

На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.