Македонија
1. March 2016 - 14:54

Тalk IN Business конференција „Дистрибуција и логистика“

„Дистрибуција и логистика“ е темата на четвртата интерактивна Talk IN Business конференција, што се одржува денеска во Скопје, во организација на магазинот InStore – Македонија.

Производители, дистрибутери, логистичари и трговци од секторот за широка потрошувачка разговараат за предностите на сопствената дистрибуција, оптимизацијата на работните процеси и централното магацинско работење. Разменуваат искуства за зголемување на ефикасноста со помали трошоци, за спецификите и новитетите во магацинското работење и за трендот на аутсорсинг во дистрибуцијата.

- Ова е четврта конференција, а првпат е за логистика и дистрибуција, која е многу важен дел од работењето на FMCG-секторот, клучна алка  од синџирот без која не би можело да се функционира, изјави Верица Мартиноска, одговорен уредник на магазинот InStore – Македонија.

На конференцијата, појасни, се разменуваат искуства за проблеми и можни начини како да се решат, за иновативни процеси коишто дел од најголемите фирми во Македонија ги имаат вклучено во своето работење и за иновации на пазарот во светот кои се надеваме дека ќе стигнат и ќе се имплементираат кај нас.

Talk IN Business е регионален проект, кој македонската редакција на магазинот InStore го спроведува во Македонија. Интерактивните Talk IN Business конференции се одржуваат еднаш месечно, а секоја од нив обработува одредена категорија производи од секторот за широка потрошувачка.