Тачи ќе поднесе оставка ако се потврди обвинението против него

Доколку обвиненијата од обвинението бидат потврдени, истиот час ќе поднесам оставка како ваш претседател и ќе се соочам со нив, изјави претседателот на Косово Хашим Тачи вчера, 29 јуни во Приштина.

Тачи ѝ се обрати на јавноста пет дена откако специјалното обвинителство во Хаг против него поднесе обвинение на разгледување во кое се терети за воени злосторства и злосторства против човештвото.

„Косово е нова држава, но нејзините лидери мора да се однесуваат како вистински државници. Ќе го носам тој товар и ќе се бранам себеси, нашата слобода, со сета сила што ја имам. Нема да дозволам овие лажни обвинувања да го одвлекуваат вниманието на Косово од заземањето на местото во меѓународната заедница, како член на Обединетите нации, НАТО и Европската Унија“, кажа Тачи во опширното обраќање.

Тој додаде дека Косово е „дом на сите негови граѓани, европско и мултиетничко општество“.

„Уште еднаш и кажува „не“ на одмаздата и „да“ на меѓуетничката толеранција“, кажа Тачи, истакнувајќи дека само со изградба на граѓанска демократија Косово гради евроатлантска иднина.

„Политички грешки во мирот можеби сум правел, но воени злосторства никогаш. Дури и кога би се вратил во мрачните времиња на Милошевиќ, би го направил истото, одговарајќи на куршумот на непријателот со куршум желен за слобода, не правејќи грешки кон граѓаните од српска, ромска или албанска националност“, кажа Тачи.