Бизнис
17. September 2020 - 16:55

Субвенции од владата за вработување албанци и други малцинства во приватните фирми

Владата ќе субвенционира приватни фирми за да вработат припадници на малцинските заедници. Ова официјално го најави вицепремиерот за политички систем, Артан Груби.

Груби вели дека сè уште се работи само за идеЈа и до сега не разговарале со бизнис секторот на оваа тема, ниту размислувале како ќе се реализира проектот. Според него, со ова нема да се намали квалитетот на работниците кои ќе се врабтуваат.

Бизнис заедниците сметаат дека секоја помош за зголемување на продуктивноста на фирмите е добредојдена.

“Квалитетната работна сила значи мотор на пазарната економија во нашата земја. Оттука, Стопанската комора ја поздравува секоја одлука која е во насока на поттикнување на нови вработувања, креирање на можности за обезбедување кадар за стопанството согласно потребите на деловните субјекти, велат од Стопанската комора на Македонија.

За Комората на Северозападна Македонија пак квалитетот на работникот е најважниот критериум.

“Ние мислиме дека оваа влада и сите влади треба да бидат насочени во професионални кадри, ефикански, кои ќе придонесат за економскиот раст. Нормално, етникумите треба да се запазат, но кога е во прашање економскиот раст и просперитет, треба да бидат луѓе кои што ќе бидат експерти од тие области за да можеме сите заеднички да се движиме напред”, изјави пред неколку дена Неби Хоџа, претседател на Комората на Северозападна Македонија.

 За опозициската ВМРО-ДПМНЕ идеата за субвенционирање е дискриминирачка и неприфатлива.

“Субвенционирање на приватни компании за вработување по етнички клуч е апсолутно неприфатливо.Компаниите не треба да се делат по тоа кого вработуваат. Наместо политика на апартхејд, нека почнат да водат европски политики. Нека ги тргнат главите од тендери и пари, и нека гледаат да сработат барем нешто за граѓаните на Македонија”, изјави Наум Стоилковски, портпарол на ВМРО-ДПМНЕ.

За владејачката СДСМ, пак, ова е уште еден начин за намалување на невработеноста.
Одлуката за вработувања во приватниот сектор ја носат работодавците согласно потребите и согласно критериумите што сами си ги одредуваат. Наша заедничка битка е намалување на невработеноста и отворање нови работни места. Секако дека владата помага и ќе ги помага сите граѓани подеднакво.

Инаку, субвенционирањето на приватниот сектор ако вработува по етнички клуч беше дел од предизворната кампања на ДУИ.