Столтенберг: Сите земји-членки на НАТО ја поддржуваат Турција

Генералниот секретар на НАТО Јенс Стролтенберг и премиерот на Турција Ахмет Давутоглу на денешната средба разговараа за итните меѓународни прашања, вклучително кризата во Сирија и минатонеделниот инцидент, соборувањето на рускиот воен авион.

- Сите земји-членки на НАТО го поддржуваат турското право да го одбрани својот територијален интегритет и воздушен простор, изјави Столтенберг по средбата во седиштето на Алијансата.

Тој додаде дека ги поддржува и напорите на Анкара за воспоставување на контакт со Москва и смирување на ситуацијата.

- Важно е да се смират тензиите, посочи Столтенберг.

Генералниот секретар на НАТО истакна и дека во иднина треба да се избегнуваат сличните ситуации.

- Инцидентот од минатата недела покажа колку е важно да се зајакнат меѓународните механизми за да се изгради стабилност, транспарентност и предвидливост во нашите односи со Русија. Тоа е клучно за да се намали ризикот од инциденти и несреќи, наведе Столтенберг.

Прашањата за намалување на ризиците и транспартентност на воените активности ќе се разгледуваат на состанокот на министрите за надворешни работи на земјите-членки на НАТО, што ќе се одржи на 1. и 2. декември.

Столтенберг апелира и Русија да има конструктивна улога во Сирија во борбата против Исламска држава.