Балкан
11. October 2019 - 14:33

Столтенберг побара воздржаност од Турција за операцијата во Сирија

Генералниот секретар на НАТО Јенс Столтенберг ја повика Анкара на воздржаност во однос на на операциите во североисточна Сирија, но исто така изјави дека е легитимна загриженоста на Турција за безбедноста во врска со курдските борци во Сирија.

На заедничката прес-конференција со турскиот министер за надворешни работи Мевљут Чавушоглу во Истанбул, Столтенберг исто така изрази загриженост дека офанзивата може да го загрози напредокот постигнат во борбата против терористичката Исламска држава во Сирија. Генералниот секретар, исто така додаде дека НАТО мора да најде одржливо решение за затворениците од т.н. Исламска држава.

Чавушоглу рече дека Турција очекува солидарност од своите сојузници, нагласувајќи дека „не е доволно да се каже дека ја разбирате легитимната загриженост на Турција“.

– Ние сакаме да видиме солидарност на јасен начин – рече шефот на турската дипломатија.