Македонија
21. October 2021 - 15:56

Средба на Џафери со претседателката на албанскиот Парламент, Никола

За време на Европската конференција на претседатели на парламенти, претседателот на Собранието Талат Џафери оствари протоколарна средба новоизбраната претседателка на албанското Собрание, Линдита Никола.

Притоа, како што соопшти собраниската Прес-служба, Џафери изрази надеж дека одличната соработка меѓу парламентите на двете земји ќе продолжи да се развива и унапредува и во наредниот период.

Во продолжение на разговорот, соговорниците размениле информации за актуелните случувања во двете земји, при што, Џафери информирал за процесот на локалните избори, за кои рекол дека се спроведуваат според највисоките меѓународни стандарди и изрази уверување дека во иста фер, мирна и демократска атмосфера ќе помине и претстојниот втор круг на 31 октомври.

Двајцата претседатели се осврнале и го поздравиле позитивниот извештај на Европската комисија за напредокот на двете држави за 2021 година, презентиран минатата недела од страна на еврокомесарот за проширување Оливер Вархели, пред членовите на Комисијата за надворешни работи на Европскиот парламент.

На крајот на средбата, Џафери упатил покана до новоизбраната претседателка на албанското Собрание да ја посети земјава.