Балкан
14. August 2019 - 11:18

Сореца: Албанија е на „крајот на почетокот, а не на почетокот на крајот“ за приемот во ЕУ

Шефот на делегацијата на Европската унија во Албанија, Луиџи Сореца, изјави дека Албанија е на „крајот на почетокот, а не на почетокот на крајот“ на нејзиното пристапување во ЕУ, цитирајќи дел од говорот на Винстон Черчил од 1942 година.

Во интервју за „Евроњуз“, Сореца рече дека и Албанија и Северна Македонија имаат отворени прашања за владеење на правото кои го забавуваат патот кон ЕУ.

-Одлуката во октомври е важна за земјата, но и за ЕУ, бидејќи е во прашање и кредибилитетот на процесот на проширување. Засегнатите страни како Албанија или Северна Македонија доволно ги исполниле своите обврски кон Европската комисија, но ајде да кажем доволно напредок за отворање преговори, а не за да станат членки на ЕУ. Како што знаете, Винстон Черчил велеше дека „ова е крајот на почетокот а не почеток на крајот“,изјавил Сореца.

Европскиот амбасадор смета дека е постигнат голем напредок во Албанија, но дека има области во кои албанската администрација треба да продолжи да работи, како што се борбата против корупцијата, организираниот криминал и изборните реформи.

Според него, потребна е секојдневна работа за спроведување на реформската агенда пред одлуката на Советот на ЕУ во октомври за отворање пристапни преговори со Албанија.

Тој верува дека без оглед на одлуката во октомври, албанскиот народ кој дури 91 отсто е за членство во ЕУ ќе продолжи да верува во перспектива на ЕУ но и „ЕУ не треба да им ги пресече нивните надежи“.