Собранието в четврток ќе гласа за изборот на Костадиновски и Кадриу за уставни судии
Собранието на Република Македонија в четврток напладне на ново продолжение на 27. седница треба да гласа за Предлог законот за употреба на јазиците, во второ читање, како и за изборот на судии на Уставниот суд на РМ, откако на денешната седница немаше кворум за гласање.
Претседателот на Собранието Талат Џафери на седницата констатираше дека е завршен општиот претрес за законот и за изборот на судиите, како и дека нема кворум, по што најави гласање в четврток во 12 часот.
Законодавниот дом треба да гласа за предлозите Дарко Костадиновски и Осман Кадриу да бидат избрани за судии на Уставниот суд на РМ, на предлог на претседателот Ѓорге Иванов. Тие треба да дојдат на местото на судијките Наташа Габер Дамјановска и Гзиме Старова, на кои мандатот им заврши во октомври годинава.
Поради отсуство на предлагачите на останатите предлог закони на 27 седница од редовите на опозициската ВМРО-ДПМНЕ Џафери констатираше дека нема услови да се разгледаат тие точки. Немаше кворум ниту за работа по Предлог законот за изменување и дополнување на Законот за пензиско и инвалидиско осигурување, по скратена постапка, кој е на дневен ред на 26. седница, како и за Предлог законот за изменување и дополнување на Законот за заштита на сведоци по скратена постапка, кој е дел од 22-та седница. Во рамки на 22. седница заврши општата расправа за Предлог законот за престанок на важењето на Законот за Советот за утврдување факти и покренување постапка за утврдување одговорност за судија по скратена постапка, за кој исто така ќе се гласа в четврток.
Собранието, како што најави Џафери, ќе продолжи со работа по 15:30 часот по редовната пауза на пратениците.
Ова е прв работен ден на пратениците по новогодишниот одмор.
Ново на Сител
-
Две лица се приведени за убиството на лекарот во Железара
-
Се финализираат коалициите пред почетокот на кампањата за претседател следната недела
-
Во Собранието последна нова седница во овој парламентарен состав
-
Путин: Во Европа го плашат народот дека ќе ги нападнеме, сакаат да им ги земат парите
-
Четворица убиени, петмина избодени во напад во Илиноис
-
Руските сили гранатираа 17 населени места во областа Херсон, две лица загинаа
-
Состојба на патиштата
-
Променливо облачно со повремен дожд, грмежи и ветер