Живот
10. February 2020 - 8:57

Со Кастел Волтурно, некогаш омиленото италијанско туристичко гратче, денеска владее нигериската мафија

Гратчето Кастел Волтурно, некогашен туристички рај во Италија што се наоѓа меѓу Рим и Неапол, стана центар на нигериската мафија во Европа, пишува Дојче Веле.

Градот оддалечен само два часа возење од Рим, некогаш познат како семеен туристички рај, денеска е центар на организираниот криминал и сиромаштијата. Денеска во него живеат бегалци од Африка, а властите кренаа раце од ова место.

Во Кастел Волтурно денеска владее мафија

Освен италијанската мафија, тука во последните годни се етаблира и нигериската.

Давиде, некогашен член на еден од нигериските кланови, а денеска доушник на полицијата, за Дојче веле изјави дека двете мафии, со различен етнички предзнак, многу добро се надополнуваат. Всушност, Камора овој град им го препушти на нигериските бандити.

– Кастел Волтурно е центар на нигериската мафија и единственото место каде што можете да живеете, а никој да не ве контролира. Овде можете да правите што сакате, а властите воопшто ништо да не дознаат, рече Давиде.

Нигеријците тука „вртат“ милиони од дрога и простутуција 

Нигеријците овде „вртат“ милиони, пред сè, од шверцувана дрога и присилна проституција. Давиде бил еден од шверцерите на дрога. Патувал каде и да требало, од Еквадор, Малезија или Бразил, и во мали пакетчиња што ги голтал кокаинот го пренесувал во Италија. Во желудникот можело да му собере и до 1,2 килограм.

– Ако некој курир по доаѓањето во Италија и од некоја причина не можел кокаинот да го исфрли од стомакот, тогаш го врзувале и го оставале да умре. И потоа кокаинот му го ваделе од стомакот. Стоката била побитна од човекот. Човекот не вреди ништо, рече Давиде.

 
– Околу 10 часот навечер следевме дали на отворено море се појавува некој сигнал. Тогаш скокавме во глисерите и ја собиравме стоката, додаде тој.
 
Дрогата, инаку, најчесто ја пренесувале рибарски бродови.
 

Мафијата ги зазема напуштените згради и во нив тргува со оружје, дрога и жени

Во Кастел Волтурно нигериската мафија има одврзани раце. Како и на други места во Италија, властите тешко се соочуваат со организираниот криминал. Мафијата ги зазема напуштените згради, што овде ги има во сè поголем број, и во нив тргува со сè и сешто: оружје, дрога, жени и девојчиња, кои ги присилува на проституција.

Нигериската мафија е формирана во Италија

Инаку, додава Дојче веле, се претпоставува дека нигериската мафија е формирана токму во Италија и тоа по урнекот на домашната Камора. Регрутацијата се врши меѓу бегалците, кои тука со години назназад доаѓаат по морски пат.