Спорт плус
19. March 2016 - 10:02

Словенечка доминација на Планица

Словенецот Роберт Крањец победи на претпоследниот индивидуален натпревар во ски скоковите во Светскиот куп. Успехот на Словенците на домашен терен, на легендарната скокалница во Планица, го комплетираше најдобриот оваа сезона, Петер Превц, кој го освои второто место.
 
Роберт Крањец до втората сезонска победа, вкупно седма во кариерата, стигна со скоковите од 224,5 и 236 метри, кои му донесоа 447,6 поени.
 
Пред 22.500 навивачи на Планица второто место го освои најдобриот оваа сезона, Петер Превц, со скоковите од 218 и 242 метри. 
 
Третото место, исто како и на натпреварот кој се одржа ден претходно, му припадна на Норвежанецот Јохан Андре Форфган (223,5 и 232 метри).
 
На Планица в сабота на програмата е тимското натпреварување, а в недела е големото финале со кое ќе заврши сезоната во Светскиот куп.