Скопје подготвен за добра организација на ЕП за кошаркари до 18 години

На четири дена пред стартот на првенството, денеска Кошаркарската федерација на Македонија организираше средба со новинарите на која, за очекувањата на шампионатот од нашата репрезентација, говореа селекторот Милевски и капитенот Стојановски кои беа едногласни дека доколку продолжат со колективната игра кога го красеше тимот во подготвителниот период, може да се очекува добар резултат. 

Градот Скопје, ќе ја има привилегијата и обврската да ги угости 24-те земји учеснички, а обврската за позитивен резултат останува на играчите и стручниот штаб истакна градоначалникот Шилегов, посакувајќи им успех. 

Спортскиот директор на федерацијата Темелковски изразувајќи благодарност за соработката со град Скопје, најави дека федерацијата заедно со главниот град на Македонија, како и грчките Атина и Солун ќе се обидат заеднички да добијат организација на шампионат во сениорска конкуренција. 

Црвено-жолтите се во групата Ц каде за противници ќе ги имаат селекциите на: Чешка, Холандија, Израел, Исланд и Луксембург. Пласман во следната фаза ќе обезбедат двете најдобри селекции од секоја од четирите групи.

Натпреварите ќе се играат во четири сали, Јане Сандански (голема и мала), Борис Трајковски и големата сала на Кале која ќе биде и домаќин токму на нашата репрезентација во првата групна фаза од првенството. 

За љубителите на кошарката кои ќе решат да ги следат во живо натпреварите, влезот ќе биде слободен.