Џет-Сет
22. July 2020 - 11:30

Швимер: Продолжението на „Пријатели“ би се снимало во карантин

Глумецот Дејвид Швимер, попознат како Рос од „Пријатели“, за американската емисија „Тунајт шоу“ откри дека продолжението на светски познатата серија би можело да се снима во карантин…

– Тоа може да се случи во август, во средината на август. Но, искрено, ќе мора да почекаме уште недела – две за да видиме дали е доволно безбедно за да го сториме тоа. Ако нема услови, ќе почекаме додека не се создадат, истакнува Швимер.

Тој натаму додава дека новото специјално продолжение би требало да се снима во оригиналното студио Бурбанк во Калифорнија и ќе ги има истата сценографија направена по теркот на оригиналните карактеристични места од серијата.

Наводите, инаку, говорат оти секој „пријател“ – Рос, Рејчел, Моника, Фиби, Чендлер и Џои – ќе заработат меѓу 2,25 и 2,5 милиони долари.

Серијата „Пријатели“ е снимена во вкупно десет сезони, и траеше од 1994 до 2004 година. Во неа, покрај Швимер, глумеа и Џенифер Анистон, Кортни Кокс, Лиза Кудроу, Метју Пери и Мет Лебланк.