Свет
30. October 2015 - 10:30

Северна Кореја гради нов тунел за нуклеарни проби

Северна Кореја гради нов тунел на местото за нуклеарни проби, се наведува во јужнокорејски агенциски извештај, два дена пред челниците на Јужна Кореја, Јапонија и Кина да се сретнат во Сеул.

Американскиот министер за одбрана Ештон Картер исто така одделно ќе дојде во посета во недела во Сеул, со цел со јужнокорејските одбранбени претставници да разговара за реакции на ракетната и нуклеарната закана на Северот.

Местото се наоѓа на источниот брег на Северна Кореја каде се извршени три претходни нуклеарни проби, а работници и возила забрзано работат на нов тунел, јави Јонхап, повикувајќи се на неименувани извори од Владата.

- Фактот дека градат нов тунел, упатува дека намера е да се изврши нуклеарна проба во некој момент, наведува агенцијата. Нема докази кои би навеле на заклучокот дека подготовки се работат за тестирање во непосредна иднина, додаде изворот.