Серијата победи треба да продолжи

Селекторот на А репрезентацијата на Македонија Игор Ангеловски и напаѓачот Илија Несторовски на прес-конференција ги кажаа своите очекувања од пријателскиот натпреварот со Турција кој го играме утре во 19:45 часот на Националната арена „Филип Втори“ во Скопје. 

 

Здравствениот билтен на Македонија е добар, сите фудбалери се на располагање и подготвени да го дадат максимумот на утрешната пресметка. 

 

-Репрезентацијата на Турција располага со квалитет и мислам дека ќе имаме можност на вистински начин да направиме една контрола. Очекувам од моите фудбалери да бидат на нивото, исто како и на претходните натпревари. Сакаме да ја задржиме истата игра и да продолжиме со позитивните резултати. Фудбалот се игра за победи, сеедно дали е пријателски натпревар. Ни треба и поддршка, се надевам дека на трибините ќе има навивачи бидејќи ни се потребни“, изјави Ангеловски.

 

Илија Несторовски посакува победничката серија на македонската репрезентација да продолжи и против 25. светска селекција на ФИФА листата. 

 

„Секој натпревар ни е важен, навистина добро се подготвуваме. Сакаме да ја продолжиме победничката низа. Се надевам дека со триумф против Турција на вистински начин ќе го најавиме мечот со Шпанија“, изјави Несторовски.