Седници на пет собраниски комисии

Во Собранието на Република Македонија денеска седници ќе одржат комисиите  за политички систем и односи меѓу заедниците, за труд и социјална политика,  за култура, за финансирање и буџет и Законодавно-правната комисија.

На дневен ред на Комисијата за политички систем и односи меѓу заедниците е Предлог - закон за употреба на јазиците во прво читање.

Членовите на Комисијата за труд и социјална политика ќе расправаат по Предлог законот за дополнување на Законот за исплата на платите во Република Македонија, по Предлог законот за материјално обезбедување на невработените лица поради приватизацијата на претпријатијата со доминантна сопственост на државата и по Предлог законот за изменување и дополнување на Законот за минимална плата во Република Македонија, сите по скратена постапка во второ читање.

На дневен ред на Комисијата за култура се Предлог - законот за престанување на важењето на Законот за националниот уметник на Република Македонија, Предлог-законот за изменување и дополнување на Законот за употреба на македонскиот јазик, двата во прво читање и Активностите за подготовка на Предлог-програмата за одбележување на јубилејни годишнини на значајни настани и истакнати личности во Република Македонија за 2018 година.

Законодавно-правната комисија ќе расправа по Предлог - законот за изменување на Законот за медицинските студии и континуираното стручно усовршување на докторите на медицина, Предлог законот за изменување и дополнување на Законот за минимална плата во Република Македонија, Предлог законот за материјално обезбедување на невработените лица поради приватизацијата на претпријатијата со доминантна сопственост на државата, сите по скратена постапка во второ читање.

На дневен ред се и Предлог - законот за употреба на јазиците во прво читање, како и Предлог законот за дополнување на Законот за исплата на платите во Република Македонија и Предлог законот за изменување и дополнување на законот за извршување, двата по скратена постапка во второ читање.

Комисијата за финансирање и буџет ќе го разгледа Предлог законот за дополнување на Законот за приватизација и закуп на градежно земјиште во државна сопственост во прво читање.